(((اجمل الرباعيات )))

مع ان كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين
عجبى !!!!!

مرغم عليك يا صبح مغصوب يا ليل
لا دخلتها برجليا ولا كان لى ميل
شايلنى شيل دخلت أنا فى الحياة
وبكرة هاخرج منها شايلنى شيل
عجبى !!!

سنوات وفايته عليا فوج بعد فوج
واحدة خدتنى ابن والتانية زوج
والتالتة أب خدتنى والرابعة إيه
إيه يعمل اللى بيحدفه موج لموج؟
عجبى !!!!!

أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى !!!!!

ياما صادفت أصحاب وماصحبتهمش
وكاسات خمور وشراب ومشربتهمش
أندم ع الفرص اللى أنا سبتهم
والا ع الفرص اللى مسبتهمش
عجبى !!!!!

ليه يا حبيبتى ما بينا دايماً سفر؟
ده البعد ذنب كبير لا يغتفر
ليه يا حبيبتى ما بينا دايماً بحور؟
أعدى بحر ألاقى غيره اتحفر
عجبى !!!!!

أنا كل يوم أسمع فلان عذبوه
أسرح فى بغداد والجزاير وأتوه
ما اعجبش من اللى يطيق بجسمه العذاب
واعجب من اللى يطيق يعذب أخوه
عجبى !!!!!

وقفت بين شطين على قنطرة
الكدب فين والصدق فين يا ترى؟
محتار أموت ، الحوت خرج لى وقال
هوا الكلام يتقاس بالمسطرة؟
عجبى !!!!!

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟
عجبي !!!

يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي !!!